ستة يناير 2019 - حلم الاستوديو

حلمت إني مع مجموعة أصدقاء بنت وشابين بنفتتح صيدلية احنا الأربعة شركا فيها، وفي أول يوم لينا محتارين نقسم الشغل ازاي ونتعامل مع المرضى والزباين ازاي. بعد شوية مواقف مع زباين، بيجي لينا استدعاء من جهة غامضة إننا في مهمة خطيرة. أنا وزميل من التلاتة بنروح العنوان اللي عليه الاستدعاء، وكإنه استوديو في هوليوود. بندخل من بوابة ضخمة نلاقي في وشنا مواقع تصوير (لوكيشنز) مختلفة كلها ديكورات ويسترن. باتأمل في التفاصيل موقع ورا موقع وباشوف تصوير لمشاهد ضرب نار وخناقات، لحد ما بنوصل لما يبدو إنه المخرج ومعاه مساعد ومصورين وناس. يتضح إن المخرج ده هو اللي عامل لنا الاستدعاء وإنه بيشتغل في المخابرات وعايزنا في مهمة قومية، وصحيت من الحلم.

أول يناير 2019 - حلم الميكروفون

حلمت إني معزومة عند خالتي ومعزوم معايا خالي ومراته، ومعاهم شاب يبدو إنه يقرب لمراته. الكبار كانوا قاعدين مع بعض، والشاب ده مع ما يبدو إنه مجموعة من شباب العيلة قاعدين في أوضة مع بعض. وأنا في وسط الكلام مع خالي ومراته لقيت الشاب ده جاي وبيقول لي أنا عاوز أفرجك على حاجة. استغربت، لإن مش من عادة الشبان إنهم يحبوا يشاركوا تجاربهم مع الكبار، لكن قلتله تمام تعالي فرجني. أخدني للأوضة اللي فيها الشباب، والشباب بيهزروا ويلعبوا مع بعض، وهو وراني صندوق فيه ما يبدو إنه جهاز إلكتروني. فتح الصندوق وطلع منه ميكروفون وسماعات، فيما يبدو إنه sound system. في البداية استغربت إيه المهم في الجهاز ده، لكنه مسك الميكروفون وابتدى يشرح لي إنه ميكروفون ذكي ومليان options، مسكت الميكروفون وابتديت أتفحص الزراير والoptions ولقيتها معقدة فعلا وفيها تضبطيات متقدمة. إلى حد ما كنت فاهمة بعض التضبيطات، لكني التفتت له وقلت له بهزار: "ده ميكروفون معقد قوي! على أيامي كان الميكروفون مفيهوش غير زرار واحد بس بيطفي ويشغل on and off." كان وشه غير معبر عن إنه فهم النكتة، وكإن بالنسبة له التضبيطات دي هي العادي اللي لازم يكون موجود. قلتله: "شايف؟ أهو فيه سويتش on and off هنا أهو برضه، ده بس المهم في كل القصة دي." بدا عليه إنه فهم، بس مانبهرش، واستمر يشرح لي ليه الميكروفون ده كول ومن أفضل الميكروفونات اللي ممكن الواحد يشتريها. وأنا باسمعه بصيت على الشبان اللي وراه اللي بيضحكوا ويهزروا، وفي عقل بالي باقول إنه كان أحسن يروح يشاركهم المرح، بس يمكن هو حاسس بالغربة عنهم عشان مايعرفهمش. أما ليه التمس الصحبة فيا فأنا مفهمتش. وصحيت من الحلم.